July 29,kum 2010 tlai dar 6 pelh hret kha ka tan chhinchhiah tlak tak a ni. Ka tunu hmuh hmasak berin a ri dik teuh deuhva "Aaaa.... pPUu..." ti a min koh vawikhatna a nih avangin. Nidangah chuan "a pu" ti rawh an tih hian "a pa" tih hian a ri chhuak thei chauhva. Hemi tlai erawh hi chuan tum thum vel mi koh ve chu!!! A nuam ve mai mai ngawt nia.
Pu nih hi nuam ka ti hranpa a ni awm e. Kum tam tak Lalpan min hruaiin malsawmna chi hrang hranga min vur zia lantir chiangtu duhawm ber zinga mi a ni miauva. Chi thlah malsawmna, Pathian hnen atanga kan dawn tluka hlu hi a awm kher lo vang. Chuvang chuan thildang nena khaikhin chi a ni lo.
Tripura a rawngbawla kan thawh laia (1988-1991) ramthara kan mi tam ber te chu Bru an ni a. An ni hian fa an neih chuan an fate hminga koh an ni a. Tu an neih ve leh an tute hminga koh an ni leh thin. Chumi khami pa/pu tih an ni zel. Tun hnu hian ka hriatthiampui ta. Ruth-i pu nih hi a lo nuam em mai. Miin engah min ngaihsak mah suhsela keia tan zawng pu nih hi a hluin a nuam veng veng e.
Ruth Remruatfeli pian tirh atanga vawiin ni thleng hian kan nun hi kawng tam takin a khawih a. Kan tawngtai tam leh zual. Thuziak ka taima thar. Ama chanchin bil Scrap bu ka siam. A pualin lehkhabu ka ziak bawk. Lalpan hmanruaah he ka tunu te hi tun apang hian a hmang a ni tih hi tu hnial rual a ni lo'ng e!!! He thuziak ka buatsaih hnu deuh hian Literature board (IET) in hemi ni vek (29 July 2010)hian ka tunu puala lehkhabu ka buatsaih chu chhuah turin an pawm thu ka dawng leh nghal! Lalpa ka va lawm em.
Sipai Pawl hmuchhuaktu (dintu ni lovin) William Booth-a chuan"Why Should The Devil Have All The Best Tunes?" a ti a. "Soul Saving Music is the Music for Me" a ti bawk. Nia kan benga rimawi hi a in ang lo viau ang le. Thlarau lam chu thu dang nise. Khawvel ri dang zawng zingah kei atan chuan ka tunuin "Aaa..pPUu" a ti ri kha hriat nuam ber pawl a ni e. Ringtute inthawina hlan Lalpa lawm zawng pawh "Thinlung lungchhia inchhir ngawih ngawih" a ni tih Sam ziaktuin min hrilh. Kan Pa Vana mi ngeng chhun rimawi chu khawvel mi tan chuan a mawina hriatthiam rual a ni lo!
"Ka aw neih chhun hi lo mawi tawp se" ti a kan zai rual hian, Lalpa lama simna thinlung dik nena kan kir hi A ngaihthah leh hawisan theih ngai hauh loh rimawi a ni tih hre reng thei ila aw. Keini nupa pawh hian thenawm a mi nau tap thawm pawh hi kan tunu rawl a ang kan ti a, kan beng a verh sam hle. Khawvel pawhin nausen lungchhe tap thawm hi a ngaihsak loh theih loh ri a ni lawm ni? Sam ziaktu sawi hi a dik zia ka hrethiam leh zual ta.
5 comments:
A lo va nula tawh em!!! a ti hlim ve ngawt ang che u. Ka Pa pawh khan a Tu hmuh hmasak ber kha chu a paw lawp lawp ania, ka hrethiam che.. :-)
Aizawl lama a pite chuan 'Matei hi a nulat hunah Colombo-ah a kal dawn asin!!!' an tih ve mai hmel e. 'Ka Fapa Ka zirlai' tih Major Rothiangi ziakte pawh min hriat chhuahtir e. Malsawmna tamtak thlentu tunu innei hi kan lawmpui a che u. Lala & Puii
A va ropui ve le. In tunu hian in chhungkua bakah kan IET pumah malsawmna a lo thlen ni reng chuan!!
Ti hian ka ngaihtuah ve thin. Ka nausen leh naupan zual lai chanchin, nungchang, nihphung leh mizia hi ka hre lo tawp a nih loh pawhin chiang taka hriat ka nei meuh lo a. Kan fapa Marcus-a thangchho ka hmuh hian chung hun laia ka nihphung zawng zawng a rawn chang nawn niah ka ruat a, chu chuan nasa takin min hnem a lungawina min pe thin. A ho angin lang mai thei, mahse hetianga ngaihtuah hi a hlimawm ve tlat.
Varte# Tu i neih ve hunah i hrethiam chauh ang, ala hla awm si. Ha..haaa....
Lala&Puii# Kan lawm e. Nia Lily veng lam chuan an ti ve ngei ang. Lokal thei se tih hi kan tawngtaina a ni.Hlawhtling lo mahse kan lungawi thova!!
Thiama#Hringnun hretthiam tura zirdan kawng hi ho a awm lo. Mahni tawn atanga kan chhui thiamloh fate ah.. fate atanga kan zir bak tute hnen atangin... chutiang zela zir chho chu kan lawm ni?
Abba (ka pa) tih pawh hi fiah lo tak a ni a, mahse hetianga koh hi Pathian lawm zawng a ni tlat nia. Nu leh pa tan te, pi leh pu tan te hian Chang tak tak chiang tak taka min koh ai chuan fiah mang lova min kohte hi an hlu thin a ni. Ka hre thiam e.
Post a Comment