Ramvachal ka ni lo . Ka kawlhrawng lo hle. Mahni a ina awma lehkha chhiar, TV en te hi ka nuam tih zawng a ni. Hnain min tirhna avanga tei chhuak kan nih loh chuan kan teihawi khat hle. Nuwara Eliya hi Sri Lanka rama boruak thengthaw nuam leh mawi a an sawi a ni. Kum 4 kan awm hnuah ramthar zauh a nih avangin kalna remchang kan nei hlauh. Vannei kan in ti khawp mai. 
Ramlaili a tlangram a ni a. A tlangdung a cham thain a rai nuam hle. "Kan Zotlang ram nuam" an ti ve ngei ang. A zovin a dai nuam. Boruak a thianghlima vaivut khu i lo hmuhtur a awm lo. Thingpui huan an siam nasa a, ram hausakna hnar pakhat a ni. Thingpui huana thawktu tam berte chu Tamil an ni. A bikin kuthnathawktute chu Tamil an ni deuh zel. Hmasanga British hunlaia India ram atanga an chawk luh an ni tlangpui.
Hmun pakhat New Zealand farm an tih mai a awma. Hetah hian bawng leh kel an vulh. A hnute sawr atana vulh an ni deuh ber. He hmuna luh nan hian mi pakhatah Rs 120 entry ticket leinan a ngai. Mi tam takin an tlawh a, sumhnar tha tak a ni awm e. Ragala an tih hmunah ringthar sawmhnih lai Chhandam Sipaia lakluh tur an awm remchang hlauh zar zovin heng hmun nuam tak hi kan han tem thei. Kan va han lawm tak em!
Bawng sangnga chuang an vulhna hmuna a hnute an sawrna khawl te kan en a. Kan tleirawl chhuak chho bawng kan vulh laia kan sawr dan nen chuan a in changkan hleih fu. Keini baltin (bucket) kapcheh chunga bawngpui hnute hmur kan hmet sawng ngawr ngawr ang kha chu a ni lo. Kut tang kha a kham duh khawp a, a hnute tang tha vak lo phei chu sawr a hrehawm thin. Bawng vulh tam deuh va pui hnih/thum tuk khat a sawr a ngaih phei chuan a rawl ve thum thin.
A hmun hma hi chei vak loh pawhin a mawi. Boruak lah a zo dai nuam em em. Ka nupui duhtak chuan " An va han vannei tak, Pathianin an ram a siam dan hi an vannei a ni ringawt", a ti deuh chhen. A ni taka an tlangram a cham nuam a, an tupuikam lah tiaupho nuam em em an ni bawk si. Tunah rambuai a reh a, hmasawnna a thangchho mek nen, khawvel ram nuam ber pawl ala ni thuai ngei ang.Ramfanga khualzin mite tan Vanram tlafual a ni thawthang e. An tangka a tlawm a, luh leh chhuah a awlsam. Keini ram angin an rama luh phalna lak a khirh ve lo. Khualbuk enkawltute lah hawihhawm tak vek an ni hlawm. Hmasawn mai lo chu hmabak an nei lo ve. Hetiang ram nuama kum li lai min chentirtu Pathian chu kan fak a ni. Eng chen nge kan la chen zui dawn kan hre lo, mahse Lalpa zarah kan lung a awi veng veng. Lalpa kohna kan chhang hi "kan vannei " kan ti thin.
6 comments:
A va nawmhmel ve le! Chawlh hahdam vang vangna hmun atan a tha a nih hi. In vanneih vang ai mahin in thawkrim a, han chawlh hahdam zauh hi in phu e.
Ka lo leng lut ve ngawt e. Sri Lanka hi a hmun a nuam an ti. Indonna boruak kara leng an ni hi an vanduai ngawt mai. A ram mi pahnih ka kawmna te kha min ti hre chhuak e. A ram ngeia i hmu chu ka lawmpui a che
Up Country lam nawmzia leh mawizia hi an sawi fo thin a, kalna hun remchang in nei a, chu pawh hna vangin. Chawlh hmanna tur nuam tak in hmuchhuak taah ngai ila, mahse, Zoram lam chu a buk a la rit zawk tho chuan ka ring
@Thiama- Thawhrim chu chawlhna nuam a ni, hla siamtuin a ti a. a dik khawp mai. Kan rim poh leh chawlh hi a nuam mai si.
@Vana- Indo a reh tawh a, ram nuam leh hmasawn chiah a hmabak.
@Fela-Buk rit lam chu sawi lo mai ang. Hmun aiin "mi" hian min hip zawk fo si a.
Kan ram pawh enkawl tha ila chuan an ni aia nuam mah zawk tur hmunhma kan nei nual. Chalfilh zo dai, Hmuifang, Phawngpui, Reiek leh a dang tam tak tlema chei leh humhalha(thing & mau leh nungcha telin) nuam em em tur hlir an ni. Ka thlen ve tawh chin ka sawi mai chauh a nia.
A nawm hmel khawp mai, keini pawh kan la vannei thei tun atang rawtuai a chintawka kan ei thiam chuan:-)a kumleh atan zuah hi kan thiam tlang turah ngai ila. kA thianpa a lo zin a, zawhna min zawh hmasak chu ' Engnga tinge Shifting cultivation/jhum cultivation in la hman le, in thing tha tak tak te hi in ui lo mi ?' tih min zawt. Chhan tur tam tak ka hre lo khawp mai. Kan ram mawina hi ramdang mi te hian an rawn hlut zawk tlat thin a, hrilh nawn fo ngai a kan awm nachhan hi eng vang nge mo ni ang le aw??
ka thil ziah hi ka zo thei lo!! Ka tui tan dawn chauh sia.. Tak2 ah phek hnih chu ka zo thei hram e, hun kala nei meuh silo a, ka rawn share dawn che u nia. A thupui chu "Viva Kolkata" a ni e.. Ka chanchin (based on true story) ngat.. hahaha
Post a Comment