Ruah alo sura tui a lo lian

Nilai ni (October 10, 2010)a ni a, zan lamah power supply a mumal lo. Ruah a sur nasa a, khawiah emaw line a chhia a ni ang, darkar 4 vel eng nei lovin kan awm. Boruak a lum tha viau. Ruah surin a tidai ve vak lo. Tukverh hawn chuan tlemin a dai deuh. Ruah in a rawn theh leh bawk si. A buaithlak duh ve khawp.

Eng neih loh avanga zan kan mut theih loh avangin zing dar 3:30 velah kan mu. November ni 11, 2010 zing chu kan tho har. Door bell a rawn ri. Mak kan ti hle. Kan driver a lo ding reng mai. Mak ka ti leh zual. Kekawr bul nen huh hnuangin a lo ding. Kan quarters building hnuai ber motor dahna chu tuiin a lo chim vek lo niin. Kan car chhung te chu tui a lo li lung mai!

A thuk laiah chuan malte thlengin kan inhnuai ber chu tuiin a chim. Kan car chu lo insure lo phei ila kan sen tur a tam viau dawn a ni. Kan buildinga motor nei hemi zana lo dah ho chu chhe lo a awm lo a ni ber. A khan sang deuh Jeep lam chi an him a ni mai. Kan thenawm ho chu tuilian lakah an lo insure lo si, kan security mawh tawk bo lo. Ruah a sura tui a lo lian insure loh motor chu mahni sen a tam hle dawn a ni. Kan chenna building pawh lift pahnih awm a ni a, a chhe ve ve. Emergency exit atanga chhuah ngai kan tawn vawikhatna a ni.

Tlai lamah khawl 2 hmangin an pump a, dar li leh a chanve chuan an lo tikang fel tawh. Kan store room leh motor chhung chu khawih fe a ngai a ni. Store hi kan motor huna bulah zim te kan nei a. Tuifinriat kama awm tih takah ruahsur a van ruahtui baw hawk hi
a luang ral zung zung thei ta thin lova, khawpui chhung a tibuai sam em em.

Kum 18 chhunga ruah tum khata sur a tam ber tum a ni an ti. Kan CS te nupa pawh anmahni tawkin an lo buai ve hle. An quarters sira tui luan chhuahna a lo inkhar a, an inchhungah tui a luang lut. An nu tum 2 lai a tawlh thlu, an pa erawh vawikhat chiah. Kan Finance Secretary te quarters pawh a lo far nasa deuh a ni ang, lui a lo luang lut an ti hial! Ruah sur tam deuh chuan min sawp hlawm viau a ni.

TLAI LEN

Tlailama pawn chhuah hi ka thil chin tam vak loh a ni. Ka nupui duhtak erawh hi chuan ina tawm hi a ning a, teihawi hi nuam a ti. Kan chenna hmun atanga hla vak lovah park a awm a. Min phut bawka ka va chhuahpui ve e ka ti a. Han chhuah takah chuan nuam chu ka ti ve phian. Boruak a thianghlim bawka pangpar te pawh an mawi tur ang tak leh rawng dik tak niawm an chhuah thei.

Pawn boruak hip chu a dan a dang deuh. Inchhunga awm chuan fan a nih loh pawhin air condition hnuaiah kan thu reng a ni mai a. Hriselna lam tan hian eng ang tak nge a nghawng tur ka hre lo. Boruak thianghlim hip tura chhuah vah chu kan mamawh hle a ni mahna.

Victoria park leh Independent square te hi kan chenna atangin an hla lo ve ve a. Ke-in minute sawmhnih vel kal chauh an ni. Tlai lam hun awl hmanna atan chuan a nuam ve ve. Taksa sawizawi duh tan pawh kalna tur remchang tak a awm. Victoria parka vaki leh sava chi hrang hrang hram ri ngaihthla a thut veng veng hi a nuam khawp.

Ama tawka inlak fit thlahlel ve tak a ni bawk a, kal chhuah tawh chuan a duhthawh thei hle. Darkar khat chuang kal lova haw chu a ui tlat zel. Mahse mithiamte sawi hi a dik a ni ang, ke a kal hian taksa rihna a ti tlem chuang lo. Independent square a veikualna tura a siam hi a lun ve viau. Hemi ni hi kan hma deuhva mi an la tlem.

Ka duhtaki hian a hun awl hman tangkai dan hi a zawng ve nasa. A kawng na chung pawhin a inthlahdah ngai lo. Ka lawm zawng siam pawh a thiam tam telh telh. Hmmmm.... ei a chakawm i ti lo maw..... ama'n a ei thei vak tawh lo chungin duhsak leh hmangaih takin ka ei turin a siam a ni. A nu leh pate hnena man pek belh turin Major Sangchhunga hian min rawn fova, a phu khawp mai.

RAH

"Va rah tur leh in rah awm reng turin ka ruat bawk a che u". Johana 15:16b.

Kan Pathian thuah hian a phuntuin a beisei anga rah chhuah lo thlai chanchin sawi a awm nual. Tun kar kal ta khan Rathnapura corps kan tlawh. An CO quarters kawtah chuan lakhuihthei kung khat hi a mal din ngawk. Ka hmuh phat atangin ka mit a la nghal. A chunga thlalak i en khian i hrethiam mai ang. A phuntu beisei ang rah chhuah a ni ang em? Rah tura beisei ang chu a nih hmel loh. Mit erawh a la hle. Kutzungpui tiat lek kim ve biai si. A hmuhnawm ka ti . Ka ngaihtuahna erawh a chawk tho nasa.

Zawlnei Isaia leh a grep chungchang te min ngaihtuah tir. Beiseina sang tak neia Grep huan siamtu chanchin kha. A huan neih lei kha a tha. Grep phun hun hma atanga a buatsaih dan te kha aw! a velin lei a lai khuar a, a kungin a ngeih theihna ngei turin a chawk dur a ni ang. A zung tha taka a thlak thuai theihna turin a lo dal thei tur lung te a chhar fai a. Thlai ching thang a ni ngei ang a chi tha a thlang thlap bawk.

Hma thar lak hian a rah tur thlir lawk hi a nuam. Ngaihtuahna hmanga duhthusam ramah chenga lo hisap lawk hi a awl khawp. Grep huan neitupa pawh hian a grep a phun hnu hian a rah hun a mitthla lawk a. A sawr khur chenin a lo peih thlap a ni. Kan naupan laiin han ti ve khanglang ila, vaimim hmun kan siam ve thin. Kan huan chu dai hnai mai a awm a ni a, khawchhung thli fur ruahtlain a len chu kan huan chhungah chuan a luang lut. A lei a ti thain thlaiin a ngeih duh em em. Kum khat chu kan vaimim chu a tam tlat mai. Khup chen lek lekah hian chhawn a thlak a, rei lote hnuah a hnah leh kung a eng a, an ro zo ta vek. A hrilhai thlak duh ngawt nia. Kan vaimim thar huna kan hralh dan tur lo chhut lawk zawng zawng chu a thlawn ta vek mai.

He lakhuihthei pawh hi a chingtu beisei ang chu a nih hmel loh. Rah ei tham a chhuah si lo. Chutiang chu nimahse mit a la viau tho mai. Kan rawngbawlnaah hian Lalpa min duh ang ni si lovin boruak nei ve tak anga lang leh pawn lawia lawm hlawh tak ang hi ka lo ni mai em aw!!! tiin ka ngaihtuah. Lal Isuan "...Keimaha in awm reng loh chuan in rah thei lo vang" a ti. A hnena awm reng ka va chak tak em!

Hemi ni hian Biakin luhna turah Thurin ziak banga tar tur an siam chu hlanna leh hawnna kan nei a. Biakin hi chhawngkhatna a awm a nih avangin step a zim deuh. Captain valai tak in an enkawl a ni a, he corps hi a naupan aiin officer pawh an thawh hlawk viau.

Lalpa Thlarau hruaina changin malsawmna kan dawng. Sipai puitling pali kan lawm lut. Zahngaihna Thutphah chhungkaw khatin an rawn siam hlanna kan nei bawk. Lalpan mi 13 lai Zahngaihna Thutphahah a hruai. Ka nupui duhtak erawh a dam chian loh avangin a tel ve thei lo. Kim lovin in hre viau mahila Lalpa ka hnenah a awm ka lawm a ni.

ARKAIDEN

"Sound the ram’s horn at the New Moon, and when the Moon is Full, on the day of our Feast" Psalm 81:3

Sakhaw tam takah hian ni leh thla hian pawimawhna thuk tak a nei deuh zel. Kan khawsakna ram hi Buddha zirtirna in a ram mipui za a sawmsarih chuang a hnehna a ni a. Thla bial lai hi an sakhaw thilah an la urhsun hle. Thla bial ni tawh chuan sa lei tur a awm lo. Khawlaiah sa khai awih a ni lo. Sa dawr an khar vek a tih ngam.


An sakhaw hmunpui deuh deuhah thimhlim atangin lam mi chi hrang hrang ten kawng dungah lam an entir. Sai mawi tak taka chei ten a khat mawi tawkin an kar an hnawh. Zanlai thlengin hetianga kawngzawh hi thlatin hmun hrang hrangah buatsaih a ni. An sakhaw hmunpui 12 ten a inchhawkin he hun hi an insem.

Sorkar chawlh a nih avangin keini pawhin a zar kan zova thla a bial ni a nih tawh chuan office kan chawl. He hun hi remchanga hmangin sahuan kan nupain kan tlawh a. Mihring an lo tam em em mai. Luhna ticket kan la, a rama chen phalna nei kan nih avangin ramdangmi tana sanghnih leh SAARC ram mite tan bik chuan zariat vel sen ngaihnaah cheng za ve ve sengin kan lut thei. Ticket pe chhuaktu chuan min pe mai a. Gate kan han lut tur chu a vengtupa chuan kan ticket chu a ringhlel. Tawng kan lo thiam tha si lo. Mahse ticket pek chhuahna a hla lo bawk a, ava zawt a, kan tlang ve thei ta tho.

Kan han fang kual ve ta a. Kan nupa hian kan ramvachal lo hle tih a lang ta zauh zauh. Sa hming, sava hming hriat loh kan ngah. Tu leh fate nena fang ni ta ila, an mi zawhna chhan theih loh tur kan ngah dawn. Chutiang hun a thlen hma chuan Mizo ramsa, nungcha leh sava chi hrang hrang ziakna bu a awm chuan kan zir vat a ngai a ni.

Sanghawngsei kan han hmu chiah chu sa chi hrang hrang kan zir thar a ngaih zia a lo lang chiang zual. Ka my dear-i chuan phur zet hian "Khi, khi.. Zebra" a ti hem mai! Kan pahnihin kan bula mite ngaihdan tur pawh dawn chang lovin kan nui kiah kiah mai maw le. A ti hlimawm ve thin a nia.

Kan kalna bakah chuan Zebra chu a lo awm thova. La nui bawk bawk chungin a hungna pal bula dingin uluk tawkin thla kan inlaktawn sak ta nghe nghe. Khawmpui urhsun leh Thlarau malsawmna tam tak changa kan hmang zo, thawk lakna hun tha Lalpan min pe kan va hlimin kan va lawm tak em! Thlarau lama indona tawngtai khaidiat ni li chhung kan hmang a, Lalpa ropuizia kan hmu.

Sorkarin a rama sakhaw hlun leh lian ber ni serh ram pum chawlh a puan hi kawng hrang hrangin hman tangkai dan kan ngaihtuah ve a. Seminar leh workshop neihna remchangah te kan hmang thin. A remchang ber awma kan ngaih thla chu kan biak in leh hmunhma tihfaina atan kan ruahman bawk. "For the love of my Temple" tiin hnatlang kan ko. Lalpa biak buk tithianghlim tura sipaite zirtirna tha tak a nih kan beisei.

SIPAI KHAWMPUI

Sri Lanka territory hian danglamna tha tak a neih chu ram pakhata territory mal awm hi a ni a. Tawng chi hrang pathum chiah a ramah hian hman a ni bawk. Saptawng, Sinhala leh Tamil te hi. Kum sawmthum dawn tualchhung buaina avanga ram pum huap khawmpui neih pawha inhmukhawm tha thei ngai lo kha kumin chu motor kawngte hawn a lo nih tak avangin khawmpui zalen tak mai kan nei thei. Ava lawmawm tak em!

Hmuchhuaktu pawh a theology ropui tak -ei tur pe la, bualfaila chhandam rawh tih nen a rawn pen chhuak a, kan thalai rualte hmangin a lem kan hmu. Khawmpui boruak a siam tha ngei mai. Thiam leh zei takin kan thalai rualte hian Hmuchhuaktu thahnemnagihna thu hi an rawn entir.



Khawmpuiah hian thalaite zinga rawngbawl tura chher mi engemawzat hnenah certificate hlan a ni bawk. He course hi NCC pawmpui a ni a, pawl sawm pass tawh ten an zir tur anga buatsaih a niin a course hming chu Certificate in Christian Ministry tih a ni.



Kumtin a Social Service puala sum tuakna Annual Appeal target puanna hun Financial Secretary leh Fundraising Secretary ten an kaihhruai. Division , District, Section leh Institution te target chu tlangzarhin infuihna hun tha tak a ni nghal. Vantlang hnen atanga kan sum humhchhuah hi kan senso zawng zawng za a sawmhnih vel a ni.



Pathian fak leh chibai buk hi kan la urhsun khawp. Inkhawm apiangin thalaite hian kaihruaiin hun bik pek a ni thin. Kan khawmpuiah pawh hian hun tha tak pek a ni. Hlim taka fak hla hmanga Lalpa chibai buk hi a nuam si a. Kan fak leh chibaibukna hun hruaitute hi an tha ve khawp mai.

An tam viau lo na a, kan band te pawh hi hla hruai atan chuan tudang kan ngai bik lo. Band Master hi a duh uluk hle a, a naute a vawng tha. Enlawkna hi kar khatah tum hnih an nei ziah. Officer nu 2 an tel thara, naupang lam hi an chher chho reng bawk. Kan khawmpui min tiphuisuitu pawimawh tak an ni.

"Darbenthek ri thum leh fiakin" tih ang deuh khan kut khuang te pawh hi an lo duh uluk khawp mai. Hman deuh khan South East lam atangin kan chah ve ngawt a, ka ngaihtuah chian hian ka zak leh deuh. A ri dik hi an lo zawng a, kan ram lamah khan chuan a rik chher chhuai chhuai a, a then dan vel a rual chuan mawi kan ti viau mai emaw ka lo ti thla ngawt a. Awmze nei taka an then leh ben zawnga ri hi a lo ni si a!!




" And there I will meet with thee, and I will commune with thee from above the mercy seat, " Exodus 25:22. A lo thleng dik a ni kan ti thei ang chu. Hmuchhuaktuin a lo sawi ang khan “I began there and I intend to die there; and if there is anything to be put in my coffin as an emblem of my heart’s delight, let it be a mercy seat”. Lalpa kan Pathian zahngaihna dawn hi mamawh lo kan awm lo vang.

A puala ruahman bik leh dawh sang te, tlar hma, a lai leh a hnung a lem chuang lo. thinlung taka inhlanna hmun apiang Lalpa Zahngaihna Thutphah a lo chang thin.

Lalpa Thalarauvin a mite a tundin lehna tura kan kum puan chu Thlarau Thianghlim malsawmna leh hruaina zarah kawng tam takin a hlawhtling chho mek. Chungnungbera kan hnena awm zel min tiamtu chu a rinawm zia kan hmu. Mahni thuthmunah pawh urhsun takin Zahngaihna Thutphah Lalpa Tharau Thianghlimin a lo hung niin a lang! Ava ropui em!!! Lalpa Pathian chu fakin awm rawhse.

Thawk chunga chawl

Lal Isuan " Buh seng tur a tam hle a, nimahsela a thawktute an tlem; chutichuan a buh seng tura thawktu turte tir turin buh Neitupa hnenah chuan ngen rawh u" a ti. Buhseng vanglai tunlai chu kan thleng a ni ber awm e. Kan kalna apiangah malsawmna ropui tak kan hmu zel mai. 8 August khan corps kan la tlawh loh tlawh theihna remchang a awm hlauh mai a. Sipai puitling 5 leh JS pakhat kan lawm lut nghal. "In thawh loh at turin ka tirh che u kha" (Johana 4:38)tih ang khan kan officer te thawhrim rah sengpui turin kan kal a. Ava hlimawm tak em!

Tunhnaiah hian ka nupui duhtak kawng na neih avangin kan zin dan tlemin kan danglam a. Langa kan kal thinna angah zan kan riak ta. Kartawp chawlh kan hmang pah a ni mai kan ti a, Inrinni chawhnuah chhuakin Inrinni zan chawlhna atan kan hmang thin. A tih chi viauvin kan hria. Kilometre za chuang te a nih avangin tlemin langa kal chu taksa a rim deuhva.

Kan tukthuan ei min rawn zawm vetu hi a tihlimawm a nia. Ka kuta chhang thawp them a rawn la ngam ! Kan chenna ram hi nungcha chunga ngil an neih zia hei hian a tichiang awm e. Mak kan tih em em chu kan DHQ compound pakhatah hian rul chhungkua an awm an ti. Nitin vawihnih kawng an rawn kan thin a ni awm e. Thah an tum lem lo.

Tun tuma kan thlenna chu sai no an neihtirna hmun (Elephant orphanage)bul a ni a. Ka my dear-i hnunga mite pawh hi sai ek. Lehkhapuan leh thildang siam nan an hmang.A hmalamah hian lui a luanga nitin tum 2 sai rual an inbual tir thin. Chutianga sai inbual chu en turin tourist tualchhung leh rampawn thahnem tak an awm reng. A en man hi rampawn mi tan chuan Rs.250 lai a ni awm e.

Kan zanriah ei hma vah harh pahin sai awm loh laiin a zu ding ve a nih hi. Kan innghahna hotel hming pawh hi "Hotel Elephant Park" ngat mawle.

Thawhrim hi chawlhna nuam a ni tih ang deuhvin kan thawk reng chungin kan chawl pah bawk a, kan hlim em em.

Kan khawsakna ram hi a danglam ve khawp. Tropical region a nih vang nge Theihai hi a rah puitling a uai thuah thuah lai hian zar thenkhatah chuan a par chuk bawk. Kan office kal kawnga tuk tin kan hmuh thin kung khat hi tlan pahin My dear-in a thla a la a. Theihai kung hi han pawthnai la i hrethiam mai ang.

Kan hriselna lam hian a ngeih vak lo tih kan hria a, kan ei tam ngai lo. Mahse hmar lam a kal chang chuan an theihai a tui bik avangin insum a har thin hle. Mak ka tih chu an theihai nget hmuh tur awm lo hi a ni. A hmin lutuk avanga ei duh loh tih loh chu a chhia hmuh tur a vang.

Kan office compound ah hian kung khat a awm ve a. A hel/sen chu tumahin an khawih ngailo. Chubakah a hmin hnuah pawh kut hleia lo lawh tum tih ang vel hi ka la hmu hauh lo. An insum thei nge thei an heh lo hrim hrim ka hre lo tlat!

Ri hriat nuam

July 29,kum 2010 tlai dar 6 pelh hret kha ka tan chhinchhiah tlak tak a ni. Ka tunu hmuh hmasak berin a ri dik teuh deuhva "Aaaa.... pPUu..." ti a min koh vawikhatna a nih avangin. Nidangah chuan "a pu" ti rawh an tih hian "a pa" tih hian a ri chhuak thei chauhva. Hemi tlai erawh hi chuan tum thum vel mi koh ve chu!!! A nuam ve mai mai ngawt nia.

Pu nih hi nuam ka ti hranpa a ni awm e. Kum tam tak Lalpan min hruaiin malsawmna chi hrang hranga min vur zia lantir chiangtu duhawm ber zinga mi a ni miauva. Chi thlah malsawmna, Pathian hnen atanga kan dawn tluka hlu hi a awm kher lo vang. Chuvang chuan thildang nena khaikhin chi a ni lo.

Tripura a rawngbawla kan thawh laia (1988-1991) ramthara kan mi tam ber te chu Bru an ni a. An ni hian fa an neih chuan an fate hminga koh an ni a. Tu an neih ve leh an tute hminga koh an ni leh thin. Chumi khami pa/pu tih an ni zel. Tun hnu hian ka hriatthiampui ta. Ruth-i pu nih hi a lo nuam em mai. Miin engah min ngaihsak mah suhsela keia tan zawng pu nih hi a hluin a nuam veng veng e.

Ruth Remruatfeli pian tirh atanga vawiin ni thleng hian kan nun hi kawng tam takin a khawih a. Kan tawngtai tam leh zual. Thuziak ka taima thar. Ama chanchin bil Scrap bu ka siam. A pualin lehkhabu ka ziak bawk. Lalpan hmanruaah he ka tunu te hi tun apang hian a hmang a ni tih hi tu hnial rual a ni lo'ng e!!! He thuziak ka buatsaih hnu deuh hian Literature board (IET) in hemi ni vek (29 July 2010)hian ka tunu puala lehkhabu ka buatsaih chu chhuah turin an pawm thu ka dawng leh nghal! Lalpa ka va lawm em.

Sipai Pawl hmuchhuaktu (dintu ni lovin) William Booth-a chuan"Why Should The Devil Have All The Best Tunes?" a ti a. "Soul Saving Music is the Music for Me" a ti bawk. Nia kan benga rimawi hi a in ang lo viau ang le. Thlarau lam chu thu dang nise. Khawvel ri dang zawng zingah kei atan chuan ka tunuin "Aaa..pPUu" a ti ri kha hriat nuam ber pawl a ni e. Ringtute inthawina hlan Lalpa lawm zawng pawh "Thinlung lungchhia inchhir ngawih ngawih" a ni tih Sam ziaktuin min hrilh. Kan Pa Vana mi ngeng chhun rimawi chu khawvel mi tan chuan a mawina hriatthiam rual a ni lo!

"Ka aw neih chhun hi lo mawi tawp se" ti a kan zai rual hian, Lalpa lama simna thinlung dik nena kan kir hi A ngaihthah leh hawisan theih ngai hauh loh rimawi a ni tih hre reng thei ila aw. Keini nupa pawh hian thenawm a mi nau tap thawm pawh hi kan tunu rawl a ang kan ti a, kan beng a verh sam hle. Khawvel pawhin nausen lungchhe tap thawm hi a ngaihsak loh theih loh ri a ni lawm ni? Sam ziaktu sawi hi a dik zia ka hrethiam leh zual ta.

Kan vannei

Ramvachal ka ni lo . Ka kawlhrawng lo hle. Mahni a ina awma lehkha chhiar, TV en te hi ka nuam tih zawng a ni. Hnain min tirhna avanga tei chhuak kan nih loh chuan kan teihawi khat hle. Nuwara Eliya hi Sri Lanka rama boruak thengthaw nuam leh mawi a an sawi a ni. Kum 4 kan awm hnuah ramthar zauh a nih avangin kalna remchang kan nei hlauh. Vannei kan in ti khawp mai.

Ramlaili a tlangram a ni a. A tlangdung a cham thain a rai nuam hle. "Kan Zotlang ram nuam" an ti ve ngei ang. A zovin a dai nuam. Boruak a thianghlima vaivut khu i lo hmuhtur a awm lo. Thingpui huan an siam nasa a, ram hausakna hnar pakhat a ni. Thingpui huana thawktu tam berte chu Tamil an ni. A bikin kuthnathawktute chu Tamil an ni deuh zel. Hmasanga British hunlaia India ram atanga an chawk luh an ni tlangpui.

Hmun pakhat New Zealand farm an tih mai a awma. Hetah hian bawng leh kel an vulh. A hnute sawr atana vulh an ni deuh ber. He hmuna luh nan hian mi pakhatah Rs 120 entry ticket leinan a ngai. Mi tam takin an tlawh a, sumhnar tha tak a ni awm e. Ragala an tih hmunah ringthar sawmhnih lai Chhandam Sipaia lakluh tur an awm remchang hlauh zar zovin heng hmun nuam tak hi kan han tem thei. Kan va han lawm tak em!

Bawng sangnga chuang an vulhna hmuna a hnute an sawrna khawl te kan en a. Kan tleirawl chhuak chho bawng kan vulh laia kan sawr dan nen chuan a in changkan hleih fu. Keini baltin (bucket) kapcheh chunga bawngpui hnute hmur kan hmet sawng ngawr ngawr ang kha chu a ni lo. Kut tang kha a kham duh khawp a, a hnute tang tha vak lo phei chu sawr a hrehawm thin. Bawng vulh tam deuh va pui hnih/thum tuk khat a sawr a ngaih phei chuan a rawl ve thum thin.

A hmun hma hi chei vak loh pawhin a mawi. Boruak lah a zo dai nuam em em. Ka nupui duhtak chuan " An va han vannei tak, Pathianin an ram a siam dan hi an vannei a ni ringawt", a ti deuh chhen. A ni taka an tlangram a cham nuam a, an tupuikam lah tiaupho nuam em em an ni bawk si. Tunah rambuai a reh a, hmasawnna a thangchho mek nen, khawvel ram nuam ber pawl ala ni thuai ngei ang.

Ramfanga khualzin mite tan Vanram tlafual a ni thawthang e. An tangka a tlawm a, luh leh chhuah a awlsam. Keini ram angin an rama luh phalna lak a khirh ve lo. Khualbuk enkawltute lah hawihhawm tak vek an ni hlawm. Hmasawn mai lo chu hmabak an nei lo ve. Hetiang ram nuama kum li lai min chentirtu Pathian chu kan fak a ni. Eng chen nge kan la chen zui dawn kan hre lo, mahse Lalpa zarah kan lung a awi veng veng. Lalpa kohna kan chhang hi "kan vannei " kan ti thin.