Krismas 2009- video clip ve thung

Kan Girls Home administrator in a lam dan vel (choreography) a buaipui a ni. Ka hand phone hmanga ka lak a ni a, a quality a sang vak lo. Hemi zan hi Eventide a Krismas hun hman a ni a, girls home naupang thenkhat mahni chhungte hnena "U Ama" hmang tura an hawn tawh avangin Home enkawltu fanu 2 an tel ve.

Chhandamna Sipai Pawl hian Tsunami avanga tuarte chhawmdawlna hna hi kawng hrang hrangin a thawk a. Hei hi Tsunami avanga nu/pa chan naupang te puala tanpuitu kut a kan tanna a naupangte Krismas hmanpuina hun a mi a ni. heta kan naupanghote hi sakhaw hrang hrang bia an ni. Krismas hla te an sa thiam hle a, eng tik hunah emaw Nausen Isua an thinlungah a pian ngei kan beisei. An nu leh pate pawhin kan Officer te an hnaihin kawng hrang hrangah an theih angin an pui thin tih hriat chuan kan hnathawh a thlawn dawn lo tih a ti lang. Dinglam sira thawmhnaw var thu far khi beram lema changte an ni e.

Kan tar enkawl te pawh hi an duai lo. Keini chu kan tar tawh ti miah lovin mahni chanvo chu phur leh hlim takin an tihlawhtling zel.

KRISMAS HLIM TAKIN AW

" Lal pian hun lawmawm tak kan thleng leh ta, hlim taka lawmin zai i vawr ang" tih hep hep mai hi a nuam thin e. December ni 1 atang khan lal thar chibai bukna ruai nen kan tan a. Nitin chuan ruai theh lo mahila a khat mawi tawkin kan institution hovin hun an ruahman anga hmang kualin kan hun a khat ve hle. Hope House kan tih maiah hian Community Centre a awm a, chutah chuan Computer Class, Montessori, Child day Care, Tuition class leh a dang dang kan nei. Chung naupangho puala Nativity lemchan a tawpna thlalak a ni e.
Kan Boys home te pawhin an la urhsun ve khawp mai. An home tualah Krismas lemchan an entir a, nausen Isua uluk takin chibai an buk. Lemchang mahnise chibai an buk hi an ti tak hle zel. Tin an incheina tur hi an ngai pawimawh a, an phak anga tha in an ruahman thin.

Puitling te pawhin tih tak zetin Krismas hla sain, candle te chhiin an lawmna an lantir a. A urhsunna leh lawm dan chi hrang tam hi hlawhtlinna anga chhiar tur ni se chu kan nep bik hauh lo vang le. Kan biak in thenkhatah chuan Kohhran dang te tih dan angin Candle lian an hung tlara, chawlhni tin an chhi tam telh telh thin.

Thlei bik nei lo, rethei te leh daikil kara mite hnen pawh thleng phak. A thim lai ber pawh luh chhuak tur "Chhandam Sipai" nih theihnghilh lovin Krismas pa- Santa pawh Children Cancer Hospitalah kan Women's Ministries hmangin a hruai thlen a ni. An enkawlna avanga naupang sam kawlh lal maite, Lal thar hminga thilpek dawn chak taka an awm hmel hian mi a tihlim.

Tihdam theih loh natna vei te thleng phak rawngbawlna: HSBC bank thawktute leh USAID te puihna hmangin"Our Special Friends" te hnenah thilpek Mrs. Swarna de Silva (HIV/AIDS & Combatting Human Traffick Coordinator) hmalakna zarah kan sem a. Heng mite Krismas hun hmanpuina tur hian Cheng nuai li zet heng pawl pahnihte hian min rawn pe a ni. Lei hmun hnuai ber pawh Lal Isuan a thleng phak tih a tichiang. Krismas lawmna ah chuan an natna vei pawh an theihnghilh ve a ni ngei ang. Hlim takin ban pharin intihhlimna hunah an tel hlawm an fate nen.

Kan tar enkawlna hmunah pawh Krismas thawnthu a lang ho chu a chi kan kim ve biai, beram tih loh chu. Thlalak a mi hi ladies eventide home a awm te an ni. Vei lam sira kawrva ha hi a mit a del a. Hemi zan hian "I am nobody child, just like a flower....." hla kha rawn sain- "All I have I give it to the Prince of Peace" tiin thilpek a hlan a, rilru a khawih duh khawp mai.

Tsunami avanga fahrah hi 275 an zirna leh nutrition pocket money leh investment tlemte bul kan tan sak a. Heta naupang te hi Chhim (Matara corps) biala kan naupang tanpuite an ni thung. Hemi corps huam chhungah hian naupang 50 kan tanpui ani.

Tu leh fa, chungkhat, thian te leh Zoram ngaih chang awm mahse Krismas nge nge kan hlim lo thei lo .

Pi leh Pu kan ni ve ta reng mai!

A hmunah hmu thei lo mahila tunlai khawvel changkanna zar zovin a pa pui'an (Timothy-a) a thlalak a rawn thawn a. Kan tunu hmuh hmasak ber lo ni ta hmel kan han hmu thei chu kan va lawm tak em! Aizawl lam line that loh avangin kan hmulawk thei lova. Tun tum ang reng hian phone line that loh hi rei kan la ti ngai lo hial awm e.

A pian tukah (23 March 2009, zing dar 7:13 a piang a) a nu kan han phone a, "naute chu a hmel tha lutuk " tih min rawn hrilh a, hriat a nuam ngei mai. A fatir a ni bawka a nu chu a inhliam deuh. Mahse an nufain an tha an rawn ti zel a. Tete-a pawh keini nu leh pa tan chuan naupang ngaihin ngai mahila pa a ni ve ta mauh si a, a awmchilh ve chawt a. Kan theih anga zingin chanchin kan ngaichang a. A nu-in hnutetui a nei mai lo deuhva zanah a mu tha duh lo an tih chuan, ka my dear- i mut a tui thei lo. A thiam awm e. Ngaihtuahna chu Durtlang hospitalah riak a awm si.

Kan fateho pawh anmahni tawkin an phur ve hle hlawm a. U ber (Tima) pawh a hmel hriat pakhat nen scooty in naute hmel hmu turin an intawlh chhova. A hmun an han thleng chu- " A mit a keu tawh em?" a han ti heu mai! Mi hre lo ve em em te. Naute chu en chak, mahse tim bawk si in a bih duk duk a ni awm e. A rin aiin a lo hmel tha a," Ka fanu chu a hmel ava tha tak em" a ti a, a bih ta chhen a.

Naute thar pate Thartea (Rev. Lallarmawiia fapa) pawh a phur phengin a nu Manipur a awm a lo han chah ve chhen. Remchang a lo awm hlauhva a nu Remi pawh chu a lo chhuk thei hlauh. Lal rem ruat hi a va tha thin tak em. Keini awm lo mahila a ni Salemi leh a nute-i te hovin a nu ai zo takin an lo awh. Kan lawm hle mai. Pa Mala te nupa pawhin an hriat veleh an han en nghal vang vang. Nu leh pa chan tlin takin an lo chang thin a kan lawm.

Tunah hmu thei rih lo mahila Lalpan a hun a tih takah kan tunu thar Ruth Vanlalremruatfeli chu duhtakin kan la pawm ve thuai ngei ang. A hming hi a pi Khawlremi (Tetei nu)phuah a ni .

Happy 25th Anniversary

Kum 25 a lo tling ve ta reng mai!!! Nula ria pan thlarh, aw mawi tak, hlim thei leh sipai ruh ve tak mai nena "tiam tlat e" kan tih chhak kha. Kan inchhai tanna pawh Biak inah naupang khawmpui intihsiakna tur chang kan zirtir zan kha a ni a.

Training tura ka dil ve tirh phat atang khan nupui nei tura fuih ka ni nghala. Sipai a ka ngheh loh an hlauh vang nge, keimaha corps enkawl turin min ring tawk lo nge a chhan dang vang ka hre lo. Kan officer te leh Local Officer te hian ka nupui tur atana an it zawng hi an sawi an sawi a. Diktak chuan Major Sangchhunga hian Sipai Pawl nula tha awma a ngaih kan division chhunga mi hi chu a ngaihven deuh vek emaw ka ti. An enkhum fo kha keimahni corps ngeiah a lo awm khiau si a.

Kan thiante hian a rukin lawmna an lo ruahman a. Senso zawng zawng pawh anmahni thawhkhawm chawp a ni. Kan va hlim em!!! Kan car hi kan hawn dawnin a lo awm lova, driverin servicing turin a kalpui an ti a. Mak ti deuh mahila engemaw thil tih an tum ni a ringin car dangin kan haw a. Tlai dar 6:30 ah kan New Zealand pa leh Filipino pa an lokal a. Kan car chu an rawn khalh a. Hetiang hian an rawn chei-

Ka nupui duhtak hi "Lalpa min pek a ni" ka ti thin. Inngaihzawn sawi tur vak kan nei lo. Mahse rem taka chhungkua leh Sipai Pawla kan hotute nen sawihova induh tlang leh lungawi taka inneihna buatsaih a ni.

Kum 25 chhung hian ka duhlaii dawhtheihzia, hmangaihna ngah zia, chhel zia, rilru ngil leh tlang a nihna te ka hmu chiang hle. Mahse a rawng ngainat zawng ka lo hre miah lo!!! Zai a ngaina a, ka beng atan chuan a zai thiam hle bawk. A nui ring hi chu a hlimawm a, a chang chuan ka duh aiin a volume hi a sang mah thin; mahse tum bur ai chuan a tha hle zawk.

Silver Jubilee kan hman hian "tiam tlat e" han tihnawn hi a hnip sat sat hle mai. He hun hmanna a lo tel THQ family hoten nupa tuak pual hla an sak tham tham laiin ti hian kan lo inchelh ran a. A nawm dan a danglam khawp mai.

Heng zawng zawngah hian Lalpa kan va lawm em tih bak sawi tur kan nei lo. Min kotu rinawmzia lantirin a awm a, kan Pa Pathian thatna a mite hmangin a luang chhuak a ni.

Tichuan heti hian biahthu kan inhlan nawn leh ta:
"25 years seems to be a long time, but with you I enjoy it so much. It seemed just a short while!! Had it not been for you I would never be what I am. My love for you grows each year, and I am sure you agree. I would pledge even firmer and with a stronger conviction:
For better for worse, for richer for poorer, in sickness and in health, to love and to cherish, till death us do part, according to God's holy ordinance; and this I renew upon my honour, as a true soldier of Jesus Christ."

SIPAI KHAWMPUI

Sri Lanka Territory puala Sipai khawmpui January ni 24 khan buatsaih a ni. Rambukkana Division in an thlenga, Booth Tucker memorial hall ah nghatin kal kan thahnem ve hle. Territory dinhmun atanga teh chuan khawmpui hlung tak a ni e.

Rambukkana bial hi Sipai bitna a ni a. Sorkar leh kohhran dang pawhin Sipai Pawl an hmuh te lo viau. Kan hmalakna tam takah roreltu apiangin min puih an chak a, an lam tangah min it ve hle zel niin a lang. Kawngro su ve tham kan nihna bial a nih tlat avangin. Hemi hmun hi DHQ thuthmun a nih bakah Youth Centre kan nei a, a remchang leh zual. Midang tan pawh kan Youth Centre hi hman theih a ni.

Khawmpuiah hian 2008 a Lalpan hnehna min pek lawmin (SD, Annual Appeal etc.) 2009 kumthar thupui hmanga chona siam a ni nghal bawk. Kumtira hetiang inchawhthawh hi a hlawk hlein kan hria. Thlarau lam malsawmna ruai Lalpan min thehsak. Kum 2009 hian "Heal our nation" tih thupui kan hmang. A ram dinhmun thlirin hnam anga inpumkhat sawi uar a tul hle a; chi inthliarna kiang tura hmalak a tul em em laia he thupui lo dinpui hi fuh dawn viauvin a lang.

Lalpa a ropui e.





Traditional dancers

Cadets Commission & Ordination

Commissioners Lalkiamlova & Lalhlimpuii (IS &ZSWM) te chu London atanga lokalin Colombo Central Corps ah Krista Hriatpuitute Session nemnghehna leh tirh chhuahna hun an rawn hmang.

He hun hi Thlarau lam malsawmna thar Commissioner te kaltlanga luan chhuahna hun a ni tak meuh mai. Thuchah te a ropuiin a nung hle a, ruatna thara kal turin cadet te a chawktho tha hle.

Commissioner hian tuna kan mawhphurhna chelh mek hi hna pawimawh ber a nihzia fiah takin a tarlang. Kohhran dang atanga rawn chhimtu leh he hun min rawn hmanpuitute an awm nual. Training College thenawma Catholic sister te hi khel lova kan hunpui min rawn tawiawmtute an ni. Anglican Father, Methodist pastor leh Baptist pastorte nen. Kohhranhote thawhhona a tha khawp mai a, Sipai Pawl min hriat dan pawh a lawmawm viau.

Territory lian vak lo Sri Lanka ang tan chuan nupa tuak hnih leh single pakhat a belh hi a hlu khawp mai. Training lai chuan single pathum leh tuak khat an ni a, nemngheh an nih hnu ni rei loteah single pahnih te hi an innei zui ta a ni.

2009 session thar atan kan inbuatsaih mek a, kumtin thalai panga (5) tal Training a lut tur hmuh tumin kan Candidate Secretary pawh a tul ve khawp mai. Mahse ngah zawh loh chang kan nei fo. Tun a zir lai mek te pawh pali chauh an ni. Kum thara lut tur hi pasarih (7) kan beisei laiin paruk (6) kan tlin thei dawn chauh a nih hmel.

School session mila insawnnate siam a nih theih nan December thlaah nemnghehna leh tirh chhuahna hi neih a ni thin. Officer fate zirna hi ngaih pawimawh a ni tha hle. DC/DO te hnenah an fate zirlai dinhmun an hriattira, insawn thei tur an nih an inhriattir thin. Dan pangngaiah chuan chutiang chauh chuan insawnna ruahman a ni, engemaw thunun ngai avanga sawn an nih loh chuan.

A chunga mi hi Witnesses for Christ ten an session hla an sa lai a ni.


Cadet zirlai ti tha ber hnenah Colonel Arnolis Weerasoorya award Commissioner Lalhlimpuiin a hlan.

Fanu kan nei ve ta!!!

Mi tan chuan mo neih chu thil naran a ni thei e. Keini chhungkaw tan chuan fanu hmuh hmasak a ni tlat a, a hlut dan a dang hle. Dik tak chuan kan beisei aia hmaah kan nei a, kan tal buai deuh hlek. Kan nupa-in awmdan kan thiam lova kan ro a nawi niaih a ni ber. Mahse chu chuan kan tana a hlutna a tinep chuang reng reng lo. Remruatdan turah min tihkhawr deuhvin kan hmai a uang lo deuh chauh a ni.

Pathian khawngaihna leh hmangaihna - thiantha, rawngbawlpui leh unaute hmanga lang chhuak avang khan kan va han lawm tak em! London leh Kenya atanga mo lawmna dawn te, Lunglei lam atanga fam hnu Pu Vanrohlua puala ruai buatsaihna atana buhfai bag te; Kalimpong leh Colombo atanga thilpek (present) te kha Aizawl a hmun thute lawmpuina te nen an va han hlu hlawm tak em! In zavai a chungah kan lawm e.

Mawl te-in, mi 20/30 vel hriatpuinain chawhnu dar 2 ah inneihna hun kan hmang anga, reception awm lovin chawhlui kan kil ho anga kan lawi fel tir nghal mai dawn nia kan ti a. Kan phak tawka kan ngaih angin ruahmanna kan nei ve a. Tu vak mah sawm lo vang, ti kan ni a. Lalpa remruatdan a lo ni lo. Mite kaltlanga Lalpa inpuanna zarah ruai angin kan buatsaih leh ta chuk chuk a, thiantha leh laina bul hnai tak tak te pawh mumala inhrilh hman ni ta hek lo, kan ro a buai ta nuaih mai a ni ber.....mahse a tha vek mai. Kan beisei piahlama Lalpa hmangaih ropui lo lang hi a makin ava ropui tak em!!!

Mi sawm ngam lo khan ruai buatsaih thei tur anga kan awm tak siah chuan eitu hmuh loh kan hlau leh hnuhnawh a. Mahse hrilh awm ngawih ngawih hrilh fum fe loh kan ngah phah ta a nih kha. Kan hun a bichilh leh zual ta deuh a ni pakhat.

Temple mawi tawk tak mai Lalpan a rawn hip khawm a. Chawhlui kil pawh 550 zet kan tling ve hial. Kan suangtuahna piahlam daihah hlankaiin kan awm a ni. Ava mak em!!! Ava ropui tak em!!!Keimahni dinhmun atangin tehfung kan siam a: Kan Pathian hi ava tha tak em tiin lawmthu hlirin kan khat a ni.

Hun chep takah kan hotuten chawlh min pe a; official expense a hawn theihna remchang min siam a. Kum 2009 chhunga kan haw theihna kawng awmchhun chu kan hmang zova, mahse a man hliah hliahin kan hria. Hun erawh kan duh aiin a rei ta lo deuh tih chauh a ni. Kumtira chawlh hun hman zawh nghal vek kan hreh deuh avangin.

Heng zawng zawngah hian Lalpa chu fakin awm mawlh rawhse.

(Kolkatta awmlaia ziak)