Chhandamna Sipai Pawl Sri Lanka a hmunpui hi Colombo khawpui laili ah hmun zau tha tak mai kil thuma kawngpuiin a hualin a ding a. THQ building hian, kawngpui Sir James Peiris Mawatha an tih chu chhawngin, hospital lar tak mai Nawaloka nen a inthenawm a ni. Hemi chhungah hian Board room pahnih leh zing tawngtai inkhawmna hmun mi 50 vel thawl nuam tawka dawng a awm.
Hope house ah hian Pianphunga rualban lo thawhna nei mipa te tan hostel a awm a, Montesorri school te, physiotherapy clinic te, computer center te, guest room te, supply store te, quarters leh western division DHQ te a awm bawk. Hemi hmuna hian HIV/AIDS hripaite tana ei tur tha semna leh anmahni sawipuina pindan pawh siam a ni. A hming ang takin tam tak tan beiseina thar nei tura tanpuina hmun a ni e.
THQ nen a ding dunin Colombo Central Church hi biak in lian ni lo mahse a sak hmang leh lan dan hi a tha thawkhat hle. Sap tawng leh Sinhalese inpawlhin inkhawmna kalpui a ni. Band leh Worship team tha tak awm hian inkhawm boruak a tinuam ve khawp mai. Sap ram angin band hian hla mipui sak tur ang chi chu an hruai vek thin. Worship team te hian minute 20 vel tur hun an hmang deuh zel bawk. Colombo a i kal chuan Chawlhni zing inkhawm dar 9 a tan hi va chhim ve ngei ang che.
