Kan vannei

Ramvachal ka ni lo . Ka kawlhrawng lo hle. Mahni a ina awma lehkha chhiar, TV en te hi ka nuam tih zawng a ni. Hnain min tirhna avanga tei chhuak kan nih loh chuan kan teihawi khat hle. Nuwara Eliya hi Sri Lanka rama boruak thengthaw nuam leh mawi a an sawi a ni. Kum 4 kan awm hnuah ramthar zauh a nih avangin kalna remchang kan nei hlauh. Vannei kan in ti khawp mai.

Ramlaili a tlangram a ni a. A tlangdung a cham thain a rai nuam hle. "Kan Zotlang ram nuam" an ti ve ngei ang. A zovin a dai nuam. Boruak a thianghlima vaivut khu i lo hmuhtur a awm lo. Thingpui huan an siam nasa a, ram hausakna hnar pakhat a ni. Thingpui huana thawktu tam berte chu Tamil an ni. A bikin kuthnathawktute chu Tamil an ni deuh zel. Hmasanga British hunlaia India ram atanga an chawk luh an ni tlangpui.

Hmun pakhat New Zealand farm an tih mai a awma. Hetah hian bawng leh kel an vulh. A hnute sawr atana vulh an ni deuh ber. He hmuna luh nan hian mi pakhatah Rs 120 entry ticket leinan a ngai. Mi tam takin an tlawh a, sumhnar tha tak a ni awm e. Ragala an tih hmunah ringthar sawmhnih lai Chhandam Sipaia lakluh tur an awm remchang hlauh zar zovin heng hmun nuam tak hi kan han tem thei. Kan va han lawm tak em!

Bawng sangnga chuang an vulhna hmuna a hnute an sawrna khawl te kan en a. Kan tleirawl chhuak chho bawng kan vulh laia kan sawr dan nen chuan a in changkan hleih fu. Keini baltin (bucket) kapcheh chunga bawngpui hnute hmur kan hmet sawng ngawr ngawr ang kha chu a ni lo. Kut tang kha a kham duh khawp a, a hnute tang tha vak lo phei chu sawr a hrehawm thin. Bawng vulh tam deuh va pui hnih/thum tuk khat a sawr a ngaih phei chuan a rawl ve thum thin.

A hmun hma hi chei vak loh pawhin a mawi. Boruak lah a zo dai nuam em em. Ka nupui duhtak chuan " An va han vannei tak, Pathianin an ram a siam dan hi an vannei a ni ringawt", a ti deuh chhen. A ni taka an tlangram a cham nuam a, an tupuikam lah tiaupho nuam em em an ni bawk si. Tunah rambuai a reh a, hmasawnna a thangchho mek nen, khawvel ram nuam ber pawl ala ni thuai ngei ang.

Ramfanga khualzin mite tan Vanram tlafual a ni thawthang e. An tangka a tlawm a, luh leh chhuah a awlsam. Keini ram angin an rama luh phalna lak a khirh ve lo. Khualbuk enkawltute lah hawihhawm tak vek an ni hlawm. Hmasawn mai lo chu hmabak an nei lo ve. Hetiang ram nuama kum li lai min chentirtu Pathian chu kan fak a ni. Eng chen nge kan la chen zui dawn kan hre lo, mahse Lalpa zarah kan lung a awi veng veng. Lalpa kohna kan chhang hi "kan vannei " kan ti thin.

Primordial Women-lessons for today

ADAII-SILHFEN MAWII

Pathian thilsiam zingah hmeichhiate hi cheimawi nuam leh inhmeh pawl tak in ni awm e. Adai-i Bible a hmeichhia tarlana awm pathumna hming awmzia- “incheina” a lo ni pawh hi a awm ve reng a ni. Thil thenkhat hi chu chei ngial pawh a mawi chuang lem lo a awm. Hmeichhiate erawh cheimawi theih tak, chei ngai tak pawh an ni kan ti ngam ang chu. Ka tunu duat hetia ka ziak hian lo ngai haw suh ang che aw. Hmeichhiate ka fakna che u a nia.

Kan tleirawl chhuak chho tir velah hian Tlangnuamah nula te deuh hmel fel vang mai hi a awm a. A pumrua a te deuhva a dang chu a nalh viau. Tlangval ho fiamthu hian hei te hi chu dawhkan chunga hun mawi atan cheiah a itawm reuh an ti fiamthu thin. Nia hmeichhia hmeltha hi chu an lawmawm bik a ni. Mipa pawh kan hmel a tha ve thei thona a, a tlangpuiin lawm kan hlawh lo deuh zawkin ka hre thin.

Evi chanchina ka ziak ang khan, Eden huanah chuan an nun thianghlimna bak kha, incheina atan thuam thil dang an mamawhin a lang lo. Hetia Biblea hmeichhia tarlana awm, pathumna hming atana ADAII (incheina) tih a ni hian, awmzia leh entir a nei ngeiin a rinawm. Pathian nena inpawla tlaitin hun nu leh pa ber ten an hman chhung, Eden huan parmawi leh theirah tha tinreng an chen lai khan, silhfen sin leh hak reng an ngaih thu kan hre lo. Lalpa enna zarah mawina changin an nalh loh lam an hre lo a ni ngei ang.

Siamtu thu awih lova thlemna suala nu ber a tluk ni atang khan, a thap lam pawh ngai pawimawh thei lovin, theipui hnaha in khuh mawi tura tanlak an tan nghal ta pang a nih kha. Mahni mawipui tur dik tak kan hai fo zia hei hian a tichiang hle awm e. Thuawih loh leh tih loh tur suala tluk hian kan thianghlimna leh mawina a tichhe vek thin. Hmeichhiat mipatna suala tluk hi hmeichhe tan a pawi zual. Damchhung atan mahni intihhrehawmna a ni. Ka tunu duhtak he hum sual hi dai lo turin fimkhur hle ang che. I thianghlimna parmawi chu a hun hmain thliahin awm hauh lo sela i nun a nuam anga i hlim bawk ang. Nangma tan liau liau a ni e.

Pathian siam danphung rengah hmeichhiate hi inchei ngaina leh mamawh an ni. Taksa vawnfai leh tihthianghlim te pawh mipa aiin an mamawh zual. Inchei kan han tih hian mahni mawipui tur zawng thlan thiam a pawimawh. Inchei thiam chu hmel tha vak lo mahse hmuh an nuamin mit an tihahdam bik.

Thuthlungtharah hian Tirhkoh Peteran hmeichhiate incheina tur mawi tak mai leh tlo, tangka a lei ngai miah si lo min hrilh. 1Petera 3:3 a a sawi ang hian- rilru thuhnuairawlh leh nunnem, silhfen chhe thei lo – chutiang ngei chu Pathian ringtu hmeichhiate inthuamna tur chu a ni.

Ka tunu hmuh hmasak, ka duat ngawih ngawih, nikhua i lo hriat tirh atangin i inthuamna leh incheina atan, he Pathian thu hi hmang turin ka chah a che. I pu thu a ni mai lova, Pathian Thu a ni. A dikin a pawm tlak a, a mawi a, a thianghlima, a tlo mai ni lovin a chhe ve thei dawn si lo. Tichuan hmeichhe inchei thiam, tuma sawisel theihloh, i lo ni mai dawn nia.

Tunu duat

March ni 23, 2010 a ni a, Ruth Remruatfeli kum khat a tlin cham a lo ni ve ta reng mai. Kan phak ang tawkin a pian hlim atangin he hun hmang tura Aizawl a awm theih dan kan hisap thin. Lalpan remchang min ruat saka kan term tawp chawlh lak theih kum a lo ni hlauh a, kan va lawm em!
(a hmui hi mombati chhem hlum a tum ve a a tang lai a nih hi)Tu hmuh hmasak ber, fanu nei lo awt ngawih ngawih thinin tunu kan han nei a, kum khat chhung hmu thei lova han awm chu a rei duh khawp mai! Scrap bu kan siama a thlalak kan dawn leh a chanchin kan hriat ang leh blog a comment hrang hrang te kan bel khawm a. Ruth Remruatfeli, ka tunu duhtak hian a chhiar theih hun chuan a lawm ve ngawt ang.

Hand phone hmangin mi ka be ve e a ti a " A mamamaa....." tih vel bak la sawi thiam lo mahse hello an be duh che han tih chuan hand phone hi a zawng nghal vat zela. Ti hian mi be ve niawm takin a ti ve chiam thin. A birthday ni hi a hre ve ang hrimin a hlim em em mai a. Keini tu a phulo Lalpan min pe niin kan hria a kan lawm tak zet a ni. Mi a tihlim khawp mai.

A pu H Lalenvela ( a nu pa) in kel Mamit lam atangin a rawn hawn a, A nu pi ten Falkland (Zemabawk BRTF camp thlang) lamah ar (20 vel) birthday pual atan an lo vulh bawk. Baloon hi Sri Lanka a kan thianten a puala a thlalak leh piancham lawmna thu ziak nen an siam sak a ni bawk. Pathiainin mal a sawm zia heng hian a tichiang hle mai. Duhsakna ava dawng nasa tak em!!!

Kan hotute pawhin an hun chep tak karah a piancham min rawn lawmpuia kan lawmzia kan sawi thiam tawk lo. London atanga an chawlh lai a lo ni remchanga IS & ZSWM ten min rawn lawmpuia. Ruth-i pu leh IS chu an titi a inhmu hle! IET a kan hotute nupa pawh in min rawn uap a. Duh angin kan thiante kan sawm kim thei lova pawi kan ti hle.

Thilpek leh duhsakna pawh hmun hrang hrang atangin a dawng ve nual mai.

Lalpan malsawm sela a nu Dini'n ( Captain Dini) a pian lawmna atana a phuah ang kha lo la ni ngei rawhse.

Khuanu hualin dam reng se

A chun leh zua tan lunglawmna

Pi leh Pu tan malsawmna

Vanlal Remruatfeli ni zel rawh se

(A pite pahnih nen)

Tunu duhawm tak, kan phu loh min petu Pathian chungah kan va lawm tak em!!! Thian tha min lawmpuitu te leh hmangaihtute avangin Lalpa kan fak, Chhungkhat laina kan tunu min duatpuitute avang pawhin kan lawm em em a ni.